Tells One kuinua vikundi vya wabangua korosho Mahuta

 

Waziri wa kilimo Daniel Chongolo akipata maelezo kutoka kwa moja ya wafanyakazi wa kituo na kiwanda cha kubangua Korosho Mahuta wilayani Tandahimba (Picha na Musa Mtepa)

Ujenzi wa kiwanda cha Tells One General Supply  Mahuta wilayani Tandahimba mkoani Mtwara umeleta faraja kwa akina mama na wabanguaji wadogo wa korosho. Kiwanda hicho kimewezesha upatikanaji wa soko, ajira na kuboresha maisha ya wananchi hususan wanawake wa eneo hilo

Na Musa Mtepa

Vikundi vya akina mama na wabanguaji wadogo wa korosho  Mahuta wilayani Tandahimba mkoani Mtwara vimeeleza kufurahishwa kwao na ujenzi wa kiwanda pamoja na kituo cha kuwasaidia kupata soko na ajira cha Tells One General Supply.

Wakizungumza kuhusu manufaa wanayoyapata kutokana na uwepo wa kiwanda hicho, Bi Amina Mande na Bi Amina Makwangu, ambao ni wafanyakazi wa kiwanda hicho, wamesema kuwa kiwanda kimekuwa msaada mkubwa katika kutatua changamoto zao za kimaisha ikiwemo kusomesha watoto na kujikimu katika mahitaji ya kila siku.

Sauti ya Bi Amina Mande, mfanyakazi wa kiwanda cha Tells One General Supply

Baadhi ya wafanyakazi wa Tells One wakichambua Korosho karanga zilizopokelewa kutoka kwa vikundi vya wabangauaji wadogo Mahuta (Picha na Musa Mtepa)

Kwa upande wake, msimamizi wa kiwanda hicho, Bi Mariamu Chilongo, amesema dhamira ya kuanzishwa kwa kiwanda hicho ni kuwasaidia wabanguaji wadogo wa korosho, hususan akina mama, ambao hapo awali walikuwa wakikumbana na changamoto ya upatikanaji wa masoko. Amesema kiwanda hicho hupokea korosho zilizobanguliwa, kuziboresha na kuzisafirisha kwenda sokoni.

Sauti ya Bi Mariamu Chilongo, Msimamizi wa Kiwanda

Mariamu Chilongo Msimamizi wa kituo na kiwanda cha kuwasaidia wabanguaji wadogo Mahuta wilayani Tandahimba (Picha na Musa Mtepa)

Aidha, Bi Mariamu amesema kuwa pamoja na kupokea korosho kutoka katika vikundi mbalimbali, kiwanda hicho tayari kimeajiri wafanyakazi wa kike wasiopungua 50, huku matarajio yakiwa ni kuongeza idadi hiyo hadi kufikia wafanyakazi 500 siku za usoni.

Sauti ya Bi Mariamu Chilongo, Msimamizi wa Kiwanda

Kituo na kiwanda cha Tells One General Supply (TOGS) kimejengwa katika kijiji cha Mahuta wilayani Tandahimba mkoani Mtwara, kikiwa na lengo la kusaidia upatikanaji wa soko la korosho kwa vikundi vidogo vya ubanguaji pamoja na kutoa ajira kwa akina mama wa eneo hilo.

Share:

Read More

TARI-Naliendele yajadili tafiti na changamoto za kilimo msimu wa 2024/2025

 

Kaimu mkurugenzi wa TARI-Naliendele Bakari Kidunda akizungumza na waandishi wa habari baada ya mkutano wa kujadili changamoto na mafanikio ya msimu wa kilimo wa 2025/2026(Picha na Musa Mtepa)

Taassisi ya Utafiti wa Kilimo Tanzania (TARI) Naliendele imefanya mkutano wa mwaka na wadau wa kilimo kuwasilisha matokeo ya tafiti na kujadili mikakati ya kukabiliana na mabadiliko ya hali ya hewa, huku ikilenga kuongeza uzalishaji wa zao la korosho msimu ujao wa kilimo

Na Musa Mtepa

TAASISI ya Utafiti wa Kilimo Tanzania (TARI) kituo cha Naliendele, mkoani Mtwara, imeendelea na utaratibu wake wa kila mwaka wa kukutana na wadau wa kilimo kwa lengo la kuwasilisha matokeo ya tafiti zilizofanyika kwa kipindi cha mwaka mzima pamoja na kueleza matarajio ya msimu ujao wa kilimo.

Akizungumza katika mkutano huo uliofanyika Desemba 12, 2025, Kaimu Mkurugenzi wa TARI–Naliendele, Bakari Kidunda, amesema mkutano huo umewakutanisha wadau mbalimbali wa kilimo kutoka mikoa tofauti, huku ukitoa fursa kwa wadau hao kusikiliza na kujadili kazi zilizofanywa na watafiti pamoja na mipango ya tafiti zitakazofanyika katika msimu mpya wa kilimo.

Sauti ya Bakari Kidunda, Kaimu Mkurugenzi TARI–Naliendele

Aidha, Kidunda amesema miongoni mwa mafanikio makubwa yaliyopatikana katika kipindi cha mwaka uliopita ni utafiti wa teknolojia ya matumizi ya mbolea kwenye zao la korosho. Amesema utafiti huo umefikia hatua ya mwisho na matokeo yake yanakwenda moja kwa moja kwa wakulima ili yaweze kutumika kuongeza uzalishaji wa korosho.

Sauti ya pili ya Bakari Kidunda, Kaimu Mkurugenzi TARI–Naliendele

Pamoja na mafanikio hayo, Kidunda ameainisha mabadiliko ya hali ya hewa kuwa changamoto kubwa inayokwamisha uzalishaji wa mazao kwa msimu wa kilimo wa mwaka 2025/2026. Amesema TARI–Naliendele inaendelea kufanya tafiti mahsusi zitakazosaidia wakulima kukabiliana na athari za mabadiliko ya tabianchi.

Sauti ya tatu ya Bakari Kidunda, Kaimu Mkurugenzi TARI–Naliendele

Baadhi ya washiriki wa mkutano wakiwa katika picha ya pamoja baada ya mafunzo ya kujadili changamoto na mafanikio ya tafiti mbalimbali zilizofanywa na TARI-Naliendele kwa msimu wa kilimo 2024/2025(Picha na Musa Mtepa)

Kwa upande wake, Lazaro Maliganya, Afisa Kilimo Msaidizi kutoka Halmashauri ya Songwe, akimwakilisha Mkuu wa Idara, amesema mkutano huo umempa maarifa mapya yatakayosaidia halmashauri yao kuboresha uzalishaji, hususan katika kukabiliana na changamoto ya mabadiliko ya hali ya hewa iliyojitokeza katika msimu wa kilimo wa mwaka 2025/2026.

Maliganya amesema mabadiliko hayo yameathiri uzalishaji wa zao la korosho na kusababisha halmashauri kushindwa kufikia lengo la kuzalisha tani nane, huku wakilenga kufikia tani 15 katika msimu ujao wa kilimo.

Sauti ya Lazaro Maliganya, Afisa Kilimo Msaidizi Halmashauri ya Songwe

Naye George Mbaga, Afisa Kilimo kutoka Mkoa wa Tanga, amesema mabadiliko ya hali ya hewa yameathiri kwa kiasi kikubwa uzalishaji wa zao la korosho katika mkoa huo. Hata hivyo, amesema kupitia uwasilishaji wa tafiti uliofanywa na TARI–Naliendele, wamepata mwanga wa namna ya kukabiliana na changamoto za tabianchi ili kuongeza uzalishaji.

Sauti ya George Mbaga, Afisa Kilimo Mkoa wa Tanga

George Mbaga, Afisa Kilimo kutoka Mkoa wa Tanga akizungumza na waandishi wahabari (Picha na Musa Mtepa)

Share:

Read More

Waziri Chongolo afanya ziara ya kikazi Mtwara

 

Waziri wa kilimo Daniel Chongolo akiwa katika ofisi za bodi ya korosho baada ya kuwasili mkoani Mtwara Disemba 11,2025 tayari kwa ziara ya siku moja (Picha na Musa Mtepa)

Waziri wa Kilimo, Daniel Chongolo, alifanya ziara ya kikazi Mtwara kufuatilia msimu wa korosho 2025/2026, kuhimiza ruzuku ya pembejeo kwa wakulima, kuanzisha teknolojia ya ndege nyuki kupulizia dawa, na kuagiza TARI-Naliendele kufanya utafiti wa changamoto za korosho kutokana na mvua na hali ya hewa

Na Musa Mtepa

Mtwara, Disemba 11, 2025 – Waziri wa Kilimo, Mhe. Daniel Chongolo, amefanya ziara ya kikazi ya siku moja katika mkoa wa Mtwara ili kufuatilia na kuangalia mwenendo wa msimu wa korosho wa mwaka 2025/2026.

Akiwa katika ofisi za Bodi ya Korosho Tanzania, Waziri Chongolo amesisitiza kuwa serikali itaendelea kuweka nguvu kuhakikisha wakulima wanapata ruzuku ya pembejeo wanazotumia ili kurahisisha shughuli zao za kilimo.

Sauti ya 1 Daniel Chongolo Waziri wa kilimo

Aidha, ametoa maagizo kwa Katibu Mkuu wa Wizara ya Kilimo na Bodi ya Korosho kuanza kutumia teknolojia mpya ya upuliziaji dawa kwa ndege nyuki (mikorošoni), teknolojia itakayosaidia wakulima kuongeza tija na kulinda zao katika eneo zima la mkorosho.

Sauti ya 2 Daniel Chongolo Waziri wa kilimo

Vilevile, Waziri Chongolo ameitaka Taasisi ya Utafiti wa Kilimo (TARI–Naliendele) kufanya utafiti juu ya changamoto mtambuka zinazotokea kutokana na mabadiliko ya hali ya hewa, hususan mvua zinazoathiri maua ya mikorosho na kusababisha kupukutika kwa zao.

Sauti ya  2 Danile Chongolo waziri wa Kilimo

Akizungumzia hali na mwenendo wa uzalishaji wa korosho nchini, Mkurugenzi Mkuu wa Bodi ya Korosho, Frances Alfred, amesema kuwa uzalishaji ni mzuri, na katika miaka mitano iliyopita umeongezeka kutokana na uwepo wa pembejeo za bure zinazotolewa kwa wakulima.

Sauti ya Frances Alfred Mkurugenzi mkuu wa CBT

Mkurugenzi wa CBT ndugu Frances Alfred akielezea hali na mwenendo wa zao la korosho kwa waziri wa kilimo jana Disemba 11,2025 (Picha na Musa Mtepa)

Share:

Read More

Wakulima wataka ufumbuzi utofauti bei ya korosho

 

Mwonekano wa korosho zikiwa zimehifadhiwa kwenye ghala tayari kusubiria kwenda sokoni(Picha na Musa Mtepa)

Wakulima wa korosho Nanyamba wamelalamikia tofauti kubwa ya bei ukilinganisha na Tandahimba, hali inayowalazimisha kuhamishia mazao yao Tandahimba

Na Musa Mtepa

Baadhi ya wakulima wa zao la korosho wamehoji juu ya utofauti wa bei ya korosho unaojitokeza sokoni kati ya Halmashauri ya Nanyamba na Wilaya ya Tandahimba, hali inayosababisha wakulima kutoka Nanyamba kuhamishia mazao yao Tandahimba ili kupata bei ya juu.

Malalamiko hayo yametolewa jana, Desemba 11, 2025, wakati wa ziara ya Waziri wa Kilimo, Ndugu Daniel Chongolo, ambapo wakulima wameeleza kuwa kwa takribani miaka 10 sasa bei ya korosho imekuwa hairidhishi, sambamba na kuwepo kwa tofauti kubwa ya bei kati ya Tandahimba na Nanyamba.

Wamesema kuwa licha ya madai ya kuwepo kwa unyevu kwenye korosho zinazouzwa Nanyamba, mazao hayo hayo yakiuzwa Tandahimba hununuliwa kwa bei ya juu.

Sauti ya baadhi ya wakulima wakiwasilisha changamoto zao kwa waziri wa kilimo

Akizungumzia changamoto zinazolikabili zao la korosho katika Halmashauri ya Nanyamba na Mkoa wa Mtwara kwa ujumla, Mbunge wa Jimbo la Nanyamba, Mhe. Abdala Chikota, amesema Serikali imeamua kujenga kongani ya viwanda vya ubanguaji wa korosho ili kuongeza thamani ya zao hilo na kupunguza changamoto za bei pamoja na changamoto nyingine zinazowakabili wakulima.

Sauti ya Abdala Chikota Mbunge wa Nanyamba

Mbunge wa Jimbo la Nanyamba Abdala Chikota akizungumzia hali ya zao la korosho katika jimbo hilo mbele ya waziri wa kilimo(Picha na Musa Mtepa)

Kwa upande wake, Waziri wa Kilimo, Daniel Chongolo, amesema Nanyamba ni miongoni mwa halmashauri zinazozalisha korosho kwa wingi, hivyo ni wakati muafaka wa kuanza na kuendelea kujenga maghala makubwa yatakayosaidia kupanga na kupima viwango vya ubora wa korosho. Amesema hatua hiyo itamwezesha mnunuzi kutambua thamani ya korosho anayoenda kuinunua.

Sauti ya1 Daniel Chongolo waziri wa Kilimo

Waziri wa Kilimo Daniel Chongolo akizungumza mara baada ya kutembelea Kongani ya viwanda iliyopo katika kijiji cha Maranje Halmashauri ya mji Nanyamba (Picha na Musa Mtepa)

Aidha, Mhe. Chongolo amesema ili kufikia dhamira ya mwaka 2030 ya kuhakikisha korosho zinazozalishwa nchini zinabanguliwa hapa hapa nchini, ni lazima kuonesha matokeo ya ujenzi wa viwanda hivyo ili kuongeza thamani ya zao hilo.

Sauti ya 2 Daniel Chongolo waziri wa Kilimo

Share:

Read More

Waziri wa Kilimo aagiza mazao yanayolimwa kusini yapitie bandari ya Mtwara

 

Waziri wa kilimo Daniel Chongolo akitoa agizo la mazao yanayolimwa mikoa ya kusini kupitia Banadari ya Mtwara.(Picha na Musa Mtepa)

Waziri wa Kilimo, Daniel Chongolo, amemuagiza Mkurugenzi wa COPRA kuhakikisha mazao ya Ruvuma, Lindi na Mtwara yapitie Bandari ya Mtwara ili kuongeza tija, kurahisisha upakiaji na kuhakikisha fursa zinabaki kwa wakazi wa mikoa hiyo

Na Musa Mtepa

Waziri wa kilimo Mhe.Danieli Chongolo amemuagiza mkurugenzi wa COPRA  kusimamia mazao yote ya kibiashara yanayozalishwa katika mikoa mitatu ya Ruvuma,Lindi na Mtwara yapitie katika Bandari ya Mtwara ili kuongeza tija na kuwarahisishia wanunuzi  uhakika wa muda mfupi wa kusubirisha Meli,kupakia na kuondoa bidhaa.

Hayo amesema Disemba 11,2025 wakati wa ziara ya kikazi aliyoifanya katika mkoa wa Mtwara ambapo akiwa Bandari ya Mtwara amesema  kitendo hicho kitaifanya Bandari kufanyakazi muda wote na kusaidia kuongeza tija kwa Wanamtwara na taifa kwa ujumla.

Sauti ya 1 Daniel Chongolo Waziri wa Kilimo

Mizigo ya korosho ikipakiwa kwenye Meli tayari kusafirishwa kwenda nje ya nchi(Picha na Musa Mtepa)

Aidha Waziri Chongolo amesema kuwa lengo kuu sio kuzihamisha fursa kuzipeleka sehemu nyingine ni katika kuhakikisha zinabakia kwa wanamtwara,Lindi na vijana wanaozunguka ukanda wa kusini kujitafutia fedha kupitia bandari hiyo.

Sauti ya 2 Daniel Chongolo Waziri wa Kilimo

Kwa upande wake meneja wa Bandari ya Mtwara Ferdinandi Nyathi amesema hakuna haja ya kutoa Korosho kutoka mikoa ya kusini kwenda kusafirishia Dar es salaam kutokana na uwekezaji mkubwa uliofanywa na serikali kwa kuwekeza katika vifaa vya kisasa vinavyoweza kufanyakazi kwa ufanisi wa hali ya juu na kwa wakati.

Sauti ya Ferdinand Nyathi Meneja wa Bandari ya Mtwara.

Meneja wa Bndari ya Mtwara akitoa maelekezo kwa Waziri wa kilimo ya utendaji kazi wa Bandari ya Mtwara katika msimu huu wa Korosho.(Picha na Musa Mtepa)

Hii ni ziara yake ya kwanza ya kikazi ya Waziri wa kilimo Mhe.Daniel Chongolo tangu alipoteuliwa na Mh. Rais ,ambapo alifanikiwa kutembelea katika ofisi za Bodi ya Korosho,Bandari ya Mtwara,kituo cha utafiti wa Kilimo cha TARI-Naliendele,Kongani ya Viwanda Maranje –Nanyamba Mtwara,Maghali ya kuhifadhiwa Korosho ,kituo cha wajasiliam mali wadogo wa ubanguaji Korosho Mahuta na kiwanda cha Kubangua Korosho cha TANECU kilichojengwa katika kijiji cha Mmova Kitangari Newala vijijini.

Share:

Read More

Wananchi kuchangia 2,000 kumleta mganga wa asili kijijini

 

Wananchi wa kitongoji cha Nunu wakiwa katika mkutano wa kujadili changamoto ya mlipuko wa moyo (Picha na Musa Mtepa)

Wananchi wa Kitongoji cha Nunu, Msakala, wameamua kuchangia shilingi 2,000 kwa kila nyumba ili kumleta mganga wa jadi baada ya hofu ya “mlipuko wa ugonjwa wa moyo.” suluhisho

Na Musa Mtepa

Katika hali ya kushangaza, wananchi wa kitongoji cha Nunu kilichopo katika Kijiji cha Msakala, Kata ya Ziwani, Halmashauri ya Mtwara vijijini wamekubaliana kuchangia shilingi 2,000 kwa kila nyumba ili kufanikisha kuletwa kwa mganga wa asili (Jadi) atakayesaidia kutafuta na kutatua changamoto ya wananchi kukumbwa na kile wanachokieleza kuwa ni “mlipuko wa ugonjwa wa moyo.”

Wakizungumza katika mkutano wa kitongoji ulioitishwa Desemba 10, 2025 kwa lengo la kujadili namna ya kukabiliana na tatizo hilo, wananchi wamesema kuwa  hali hiyo imeleta taharuki kubwa na kuchochewa na imani za kishirikina kwa baadhi ya wakazi wa eneo hilo.

Sauti ya Wananchi wa kitongoji cha Nunu

Cornel Caspari, ambaye ni muhanga na mkazi wa kitongoji hicho, amesema kijana wake alipokumbwa na tatizo hilo alianza kuhisi maumivu ya mwili na baadaye kupata matatizo ya moyo yaliyomsababisha kuanguka chini na baadae kuinuka na kuanza kukimbia kusikojulikana huku akitamka majina ya watu wasiojulikana ( kuweweseka).

Sauti ya Cornel Caspari Muhanga wa tukio

Naye Mwenyekiti wa Kitongoji cha Nunu, Bw. Matias Poolu, amesema ukubwa wa changamoto hiyo ndiyo uliowalazimu kuitisha mkutano wa wananchi ili kujadili na kutafuta suluhisho, ambapo kwa kauli moja walikubaliana kuchangia shilingi 2,000 kwa kila nyumba.

Sauti ya Matias Pool Mwenyekiti wa kitongoji cha Nunu

Hamisi Salumu Namngwangula, Mwenyekiti wa kijiji cha Msakala ambacho kinahudumia Kitongoji cha Nunu, amekiri kuwepo kwa matukio ya wananchi kukumbwa na changamoto hiyo na kupongeza hatua ya wananchi kuitisha mkutano ili kujadiliana na kufikia muafaka.

Sauti ya Hamisi Namngwangula Mwenyekiti wa kijiji cha Msakala

Share:

Read More

Jamii yahimizwa kuepuka hisia katika kutatua migogoro

 

Afisa ufuatiliaji na tathmini kutoka shirika la TASA Hamisi Mwinshehe akiwa katika studio za Jamii fm Mtwara

Afisa wa TASA, imeitaka  jamii kutenga muda wa kufikiria na kutoa maamuzi sahihi katika kutatua migogoro, ikisisitiza kuepuka hisia na kutoegemea upande wowote

Na Musa Mtepa

Jamii imetakiwa kutenga muda wa kufikiria, kuchakata na kutoa maamuzi sahihi katika kutatua migogoro inayowakabili katika maeneo yao.

Hayo yamesemwa na Afisa Tathmini na ufuatiliaji kutoka shirika lisilo la kiserikali la Tanzania Safety Alliance (TASA) linalofanya kazi katika Manispaa ya Mtwara–Mikindani, Hamisi Rashidi Mwinshekhe, kupitia kipindi cha Dira ya Asubuhi kinachorushwa na kituo cha redio cha Jamii FM Mtwara.

Amesema kuwa mgogoro ni hali ya kuwepo kwa mivutano ya kimawazo au kimtazamo, hivyo ni muhimu jamii kutenga muda wa kutosha wakati wa mchakato wa utatuzi ili kuhakikisha kila upande unaridhika na maamuzi yatakayofikiwa.

Sauti ya 1: Hamisi Mwinshekhe – Afisa Tathmini na Ufuatiliaji, TASA

Aidha, Mwinshekhe amesema kuwa kumekuwa na sababu mbalimbali zinazosababisha kuibuka kwa migogoro katika jamii, ambazo kwa namna moja au nyingine ni muhimu kuepukika ili kujenga jamii imara na yenye amani.

Sauti ya 2: Hamisi Mwinshekhe – Afisa Tathmini na Ufuatiliaji, TASA

Ameongeza kuwa kuna mambo muhimu ya kuzingatia wakati wa kutatua migogoro, ikiwemo kuepuka matumizi ya hisia, kuonesha huruma, pamoja na kutoegemea upande wowote katika mgogoro unaoendelea.

Sauti ya 3: Hamisi Mwinshekhe – Afisa Tathmini na Ufuatiliaji, TASA

Shirika la TASA kwa sasa linatekeleza mradi wa “Amani Yetu, Kesho Yetu” katika kata tano za Halmashauri ya Mtwara Vijijini, ambazo ni Nalingu, Madimba, Msimbati, Tangazo na Mahurunga.

Mradi huu unalenga kuelimisha jamii, hususan vijana, kuhusu athari za uvunjifu wa amani na umuhimu wa kudumisha utulivu katika maeneo yao.

Share:

Read More