Dkt. Nanauka aahidi kuimarisha uchumi Mtwara

 

Mgombea Ubunge jimbo la Mtwara mjini Dkt Joel Nanauka akinadi sera zake mbele ya wananchi wa eneo la kokobichi ,kata ya Rahaleo Manispaa ya Mtwara Mikindani(Picha na Musa Mtepa)

Dkt. Joel Nanauka, mgombea ubunge Mtwara Mjini kwa tiketi ya CCM, ameahidi kuimarisha uchumi wa mji huo, kukuza ajira na kuwawezesha wajasiriamali endapo atachaguliwa. Pia amesisitiza utekelezaji wa miradi mikubwa ya maendeleo kwa kushirikiana na Serikali

Na Musa Mtepa

Mtwara, Oktoba 20, 2025 – Mgombea ubunge wa Jimbo la Mtwara Mjini kupitia Chama Cha Mapinduzi (CCM), Dkt. Joel Nanauka, amewaahidi wananchi kuwa iwapo atachaguliwa kuwa Mbunge, atahakikisha anaweka kipaumbele katika kuimarisha uchumi wa mji huo ili kuongeza ajira na kipato kwa wakazi wake.

Akihutubia mkutano wa kampeni uliofanyika katika eneo la Kokobichi, Kata ya Rahaleo, Manispaa ya Mtwara Mikindani, Dkt. Nanauka amesema kuwa Ilani ya CCM inaelekeza utekelezaji wa miradi mikubwa inayotarajiwa kuifanya Mtwara kuwa kitovu cha uchumi wa ukanda wa kusini, na kusaidia hata nchi jirani kupitia huduma na bidhaa zitakazotokana na miradi hiyo.

Sauti ya Dkt. Joel Nanauka, mgombea ubunge Mtwara Mjini

Aidha, Dkt. Nanauka ameeleza kuwa akipewa dhamana ya kuwa Mbunge kwa miaka mitano ijayo, atahakikisha ofisi yake inakuwa na utaratibu maalum wa kuwawezesha wajasiriamali, hasa vijana na wanawake, kwa kuwapatia mafunzo, vifaa na elimu ya biashara ili kuongeza tija katika shughuli zao za kiuchumi.

Sauti ya Dkt. Joel Nanauka, mgombea ubunge Jimbo la Mtwara Mjini

Kwa upande wake, mgombea udiwani wa Kata ya Rahaleo, Ndugu Edward Kapwapwa, amesema licha ya mafanikio yaliyopatikana katika kipindi cha miaka mitano iliyopita, bado kata hiyo inakabiliwa na changamoto mbalimbali, ikiwemo tatizo la mafuriko katika eneo la Nandope wakati wa masika, linalowasababishia wananchi usumbufu mkubwa.

Kapwapwa ameongeza kuwa tayari Serikali kupitia Manispaa ya Mtwara Mikindani imesaini mikataba ya TACTC kwa ajili ya ujenzi wa mifereji ya maji katika mitaa mbalimbali yenye changamoto, ikiwemo Nandope, ili kutatua tatizo hilo kwa njia ya kudumu.

Sauti ya Edward Kapwapwa, mgombea udiwani Kata ya Rahaleo

Naye Mjumbe wa Halmashauri Kuu ya CCM Mkoa wa Mtwara, Ndugu Mohamedi Abdala (Mudy Ray), amewahakikishia wananchi kuwa Dkt. Nanauka ni kiongozi mwenye moyo wa unyenyekevu na atawajibika kwa bidii katika kuwahudumia wananchi wa Mtwara Mjini.

Sauti ya Mohamedi Abdala (Mudy Ray), Mjumbe wa Halmashauri Kuu CCM Mkoa wa Mtwara

Mjumbe wa Halmashauri kuu CCM mkoa wa Mtwara Mohamed Abdala (Mudy Ray) akimnadi mgombea ubunge jimbo la Mtwara Mjini Dkt Joel Nanauka katika viwanja vya Kokobichi kata ya Rahaleo ,Manispaa ya Mtwara Mikindani(Picha na Musa Mtepa)

Katika hatua nyingine, baadhi ya vijana wa Mtwara Mjini wamewataka wananchi kujitokeza kwa wingi Oktoba 29, 2025 siku ya uchaguzi ili kutimiza haki yao ya kikatiba kwa kwenda kupiga kura na kumchagua kiongozi wanayemwamini huku wakihimiza kuepuka upotoshaji unaosambazwa mitandaoni.

Sauti ya baadhi ya vijana wa Mtwara Mjini

Share:

Read More

Makampuni 88 yajisajili kununua korosho nchini msimu wa 2025/2026

 

Mwenyekiti wa Bodi ya Korosho Tanzania Brigadia Mstaafu Aloyce Mwanjile akizungumza na Waandishi wa Habari (Picha na Musa Mtepa)

Zaidi ya makampuni 88 yamejisajili kununua korosho msimu wa 2025/2026. Bodi ya Korosho Tanzania yatoa onyo kwa wanunuzi wasio rasmi na kusisitiza matumizi ya mfumo wa TMX kuhakikisha wakulima wanapata bei bora

Na Musa Mtepa

Wakati wakulima wa korosho wakiendelea na shughuli za upaliliaji na uvunaji, imeelezwa kuwa zaidi ya makampuni 80 tayari yamejisajili kununua zao hilo kwa msimu wa mwaka 2025/2026, huku makampuni 48 yakionyesha nia ya kununua korosho karanga.

Akizungumza na waandishi wa habari katika ukumbi wa mikutano wa Bodi ya Korosho Tanzania, Mwenyekiti wa Bodi hiyo, Brigedia Mstaafu Aloyce Mwanjile, amesema hadi kufikia Oktoba 18, 2025 jumla ya makampuni 88 yalikuwa yamejisajili kwa ajili ya kununua korosho, ambapo kati ya makampuni hayo, 24 yamejisajili kwa ajili ya soko la awali, 48 kwa ajili ya kununua korosho karanga, na 16 kwa ajili ya kununua korosho ghafi.

Sauti ya 1: Brigedia Mstaafu Aloyce Mwanjile, Mwenyekiti CBT

Aidha, Brigedia Mwanjile ametoa wito kwa makampuni mengine yanayokusudia kununua korosho kuendelea kujisajili, huku akihimiza waje na bei nzuri zitakazowanufaisha wakulima pindi msimu wa mauzo utakapoanza.

Sauti ya 2: Brigedia Mstaafu Aloyce Mwanjile, Mwenyekiti CBT

Katika hatua nyingine, Mkurugenzi Mkuu wa Bodi ya Korosho Tanzania, Frances Alfred, ameeleza kuwa kumekuwepo na taarifa za baadhi ya watu kuanza kusambaza mizani kwa ajili ya ununuzi wa korosho nje ya mfumo rasmi (maarufu kama “kangomba”) na kubainisha kuwa Bodi hiyo tayari imepeleka timu maalum inayozunguka maeneo mbalimbali kubaini vitendo hivyo na kuchukua hatua kwa wale watakaobainika kwenda kinyume na utaratibu wa kisheria.

Sauti ya 1: Frances Alfred, Mkurugenzi Mkuu wa Bodi ya Korosho Tanzania

Frances Alfred amesema kuwa kuelekea msimu wa 2025/2026, Bodi ya Korosho imeimarisha mfumo wa usimamizi kwa lengo la kudhibiti kwa ufanisi zaidi biashara ya korosho na kuhakikisha mnunuzi anapata korosho bora.

Sauti ya 2: Frances Alfred, Mkurugenzi Mkuu wa Bodi ya Korosho Tanzania

Frances Alfred mkurugenzi mkuu wa Bodi ya korosho Tanzania akizungumza na Waandishi wa habari (Picha na Musa Mtepa)

Kwa mujibu wa Bodi ya Korosho Tanzania (CBT), minada ya korosho itaendelea kufanyika kupitia Soko la Bidhaa Mtandao (TMX) kama ilivyokuwa msimu uliopita, ili kuhakikisha wakulima wanapata bei kulingana na hali halisi ya soko.

Share:

Read More

CBT yatangaza ratiba rasmi ya minada ya Korosho 2025/2026

 

Mwenyekiti wa Bodi ya Korosho Tanzania Brigadia Mstaafu Aloyce Mwanjile akizungumza na Waandishi wa habari Oktoba 18,2025 katika ofisi za kuu za Bodi ya Korosho mjini Mtwara (Picha na Musa Mtepa)

Bodi ya Korosho Tanzania (CBT) imetangaza kuwa minada ya korosho kwa msimu wa 2025/2026 itaanza Oktoba 31, 2025. Wakulima wametakiwa kuzingatia ubora wa korosho na kuepuka kuuza kwa kangomba, huku minada ikiendeshwa kwa njia ya mtandaoni chini ya usimamizi wa TMX

Na Musa Mtepa

Mtwara, Oktoba 18, 2025 — Mwenyekiti wa Bodi ya Korosho Tanzania (CBT), Brigedia Jenerali Mstaafu Aloyce Mwanjile, amesema kuwa msimu mpya wa ununuzi wa korosho kwa mwaka 2025/2026 unatarajiwa kuanza rasmi tarehe 31 Oktoba 2025.

Akizungumza na waandishi wa habari tarehe 18 Oktoba 2025, Brigedia Jenerali Mwanjile amesema kuwa kwa mujibu wa historia ya misimu ya nyuma, minada ya korosho imekuwa ikianza katika wiki ya mwisho ya mwezi Oktoba, kutokana na uwingi wa korosho na ukusanyaji wake kufikia hatua ya kuhifadhiwa ghalani.

Sauti ya 1 Brig. Aloyce Mwanjile mwenyekiti CBT

Aidha, ameongeza kuwa Bodi ya Korosho tayari imetoa ratiba ya minada kwa msimu huu, na kuwataka viongozi wa vyama vya msingi (AMCOS) kuanza kupokea korosho za wakulima kuanzia tarehe 22 Oktoba 2025, kwa kuzingatia taratibu za ubora wa korosho kama ilivyoainishwa.

Sauti ya 2 Brig. Aloyce Mwanjile mwenyekiti CBT

Vilevile, Brigedia Mwanjile amewaonya wakulima dhidi ya kuuza korosho kwa wanunuzi wa mitaani maarufu kama kangomba, akibainisha kuwa kitendo hicho ni kinyume cha sheria na kinahatarisha maslahi ya mkulima mwenyewe.

Sauti ya 3 Brig. Aloyce Mwanjile mwenyekiti CBT

Kwa upande wake, Mkurugenzi Mkuu wa Bodi ya Korosho Tanzania, Ndg. Frances Alfred, amesema kuwa msimu huu kutakuwa na usimamizi madhubuti kuanzia ngazi ya vyama vya msingi (AMCOS), ambapo vijana wa mpango wa Jenga Kesho Iliyo Bora watasimamia ubora na kiasi cha korosho zinazopelekwa kwenye maghala makuu.

Sauti ya Frances Alfred Mkurugenzi CBT

Mkurugenzi mkuu wa CBT ndug Frances Alfred akizungumza katika mkutano na waandishi habari uliofanyika Oktoba 18,2025 katika ofisi za bodi hiyo mjini Mtwara( picha na Musa Mtepa)

Katika kuhakikisha uwazi na ufanisi, msimu wa korosho wa mwaka 2025/2026 utaendelea kuendeshwa kwa mfumo wa minada ya mtandaoni chini ya usimamizi wa Soko la Bidhaa Tanzania (TMX).

Share:

Read More

Wanasalamu Kanda ya Kusini wamsaidia mwenye ulemavu

 

Mwakilishi wa Wanasalamu Kanda ya Kusini akikabidhi godoro na daftari kwa Mzee Somba ikiwa ni mchango wa umoja huo (Picha na Musa Mtepa)

Wanasalamu Kanda ya Kusini kwa kushirikiana na Jamii FM wametoa msaada wa godoro na vifaa vya shule kwa Mzee Salumu Somba, mlemavu wa macho na mkazi wa Mnyengedi, baada ya kuguswa na hali yake kupitia kipindi cha Sikika. Wametoa wito kwa jamii kushirikiana kusaidia wenye uhitaji.

Na Musa Mtepa

Umoja wa Wanasalamu Kanda ya Kusini kwa kushirikiana na wadau wa Jamii FM Radio, leo Oktoba 15, 2025, wametoa msaada wa godoro na vifaa vya shule kwa familia ya Mzee Salumu Somba, mkazi wa Kijiji cha Mnyengedi,Mzee Somba ni mlemavu wa macho na anaishi katika mazingira ya kipato duni.

Akizungumza kwa niaba ya umoja huo wakati wa kukabidhi msaada, Bi Mwanahawa Nayopa (Mrs. Machela) amesema kuwa walipata taarifa za hali ngumu ya maisha ya Mzee Somba kupitia kipengele cha Sikika, kinachorushwa hewani na Jamii FM Radio kupitia kipindi cha Dira ya Asubuhi.

Kupitia taarifa hiyo, waliguswa na hali ya familia hiyo, hasa watoto wa Mzee Somba wanaosoma katika Shule ya Msingi Mwenge, na wakaamua kuchangishana fedha kwa ajili ya kununua godoro pamoja na vifaa vya shule.

Sauti ya Mwanahawa Nayopa – Mwakilishi wa Wanasalamu Kanda ya Kusini

Aidha, Bi Nayopa ameishukuru Jamii FM Radio kwa mchango wake mkubwa wa kuibua changamoto mbalimbali zinazowakabili wananchi, hususan watu wenye uhitaji maalum. Ametoa wito kwa jamii nzima kuendeleza moyo wa kusaidiana kwani kusaidia wenye uhitaji si jukumu la mtu mmoja bali ni la jamii nzima.

Sauti ya Mwanahawa Nayopa – Mwakilishi wa Wanasalamu Kanda ya Kusini

Kwa upande wake, Mzee Salumu Somba amewashukuru Wanasalamu kwa msaada waliompatia, huku akiwaombea baraka tele kutoka kwa Mungu huku akisema kuwa msaada huo umempa faraja kubwa na kuwaomba waendelee kuwa na moyo huo wa huruma kwa wengine wenye mahitaji kama yake au hata zaidi.

Sauti ya Mzee Salumu Somba – Mlemavu wa Macho

Naye Ebby Hamisi, Mtendaji wa Kijiji cha Mnyengedi, ametoa shukrani zake kwa Umoja wa Wanasalamu kanda ya kusini kwa kuguswa na hali ya Mzee Somba na kutoa rai kwao kwa kutokata tamaa kutokana na maneno ya kubezwa au kudhihakiwa, bali waendelee kufanya mema kwa jamii.

Sauti ya Ebby Hamisi – Mtendaji wa Kijiji cha Mnyengedi

Share:

Read More

Kijiji chaingiwa hofu ya ushirikina mkoani Mtwara

 

Kitu kinachodahniwa kuwa ni cha kishirikina kikiwa kimezungushiwa hirizi(Picha na Musa Mtepa)

Taharuki yatanda Magomeni Nyasi baada ya kugunduliwa kifaa kisichojulikana chenye hirizi, kinachodhaniwa kuhusika na imani za kishirikina. Wakazi wataka uchunguzi wa kina kufuatia ongezeko la matukio ya aina hiyo kijijini

Na Musa Mtepa

Mtwara –Wakazi wa kijiji cha Magomeni Nyasi, kilichopo kata ya Tangazo, Halmashauri ya Mtwara Vijijini, Oktoba 12,2025 wameamka na taharuki kubwa  baada ya kukutwa kwa kifaa kisichojulikana kilichozungushiwa hirizi, tukio linalodhaniwa kuhusishwa na imani za kishirikina.

Wakizungumza na Jamii FM, baadhi ya wananchi wameelezea mshangao wao juu ya tukio hilo, wakikitaja kuwa cha kutisha na kisicho cha kawaida.

Sauti ya wananchi wa kijiji cha Magomeni Nyasi

Kijana mmoja aliyejitambulisha kwa jina la Alfani amedai kuwa tukio hilo lina uhusiano na ujio wa waganga wa kienyeji waliotembelea kijiji hicho siku za nyuma kwa lengo la kutoa uchawi.

Sauti ya Alfani, kijana mkazi wa Magomeni Nyasi

Mzee Abdala Yusuf Nammandila, ambaye ndiye mmiliki wa nyumba iliyokutwa na kifaa hicho chenye hirizi, amesimulia jinsi alivyokigundua na hatua alizochukua mara baada ya kukikuta.

Sauti ya Mzee Nammandila

Tukio hili limezua hofu miongoni mwa wakazi wa kijiji hicho, wengi wao wakitoa wito kwa mamlaka husika kufanya uchunguzi wa kina kuhusu matukio ya kishirikina ambayo yanaonekana kuongezeka kwa kasi maeneo ya vijijini.

Share:

Read More

Malezi duni yatajwa sababu ya mimba mashuleni Mtwara

 

Baadhi ya wananchi wa kata ya Naliendele wakishiriki mdahalo huo(Picha na Mohamed Masanga)

Mdahalo ulioandaliwa na Jamii FM umebainisha kuwa mimba mashuleni husababishwa na malezi duni, kutokuwepo kwa uangalizi wa karibu kutoka kwa wazazi, pamoja na ushiriki wa jamii hafifu katika kulinda watoto wa kike

Na Musa Mtepa

Inaelezwa kuwa ukosefu wa malezi na maandalizi bora kwa watoto kutoka kwa wazazi umeendelea kuwa moja ya sababu kuu zinazochangia wanafunzi wa kike kupata mimba wakiwa bado shuleni.

Hayo yamebainika katika mdahalo ulioandaliwa na Jamii FM Radio Oktoba 8, 2025, uliokuwa na kaulimbiu “Jamii Inashiriki Vipi Katika Kutokomeza Mimba Shuleni.

Maafisa usafirishaji (bodaboda) kutoka stendi ya Bajaji, kata ya Naliendele, wameeleza kuwa mimba nyingi zinazopatikana shuleni huchangiwa na wazazi kulega katika malezi, ikiwemo kuruhusu watoto kushiriki matukio ya usiku kama vile vigodoro, ambayo huwapeleka katika mazingira hatarishi.

Sauti ya maafisa usafirishaji – kata ya Naliendele

Hata hivyo, baadhi ya wazazi wamepinga kauli hiyo wakisema si wazazi wote huruhusu watoto wao kwenda kwenye vigodoro. Shaibu Abdala Kupela na Brandina Chilumba, ambao ni wazazi, wamesema kuwa kuna sababu nyingine nyingi zinazochangia mimba shuleni, ikiwemo wazazi kutengana bila sababu za msingi, hali inayosababisha watoto kukosa uangalizi wa kutosha.

Sauti za wazazi wakichangia mjadala

Kwa upande wake, Mwenyekiti wa Serikali ya Mtaa wa Pachoto “A”, Bw. Sadi Abdala Kombo, amesema kuwa ili kuondokana na tatizo la mimba mashuleni, ni lazima wazazi wasimame imara katika kulea watoto wao na kutambua wajibu wao kama walezi.

Sauti ya Sadi Kombo – 1 Mwenyekiti wa Mtaa wa Pachoto A

Aidha, Mwenyekiti huyo amesisitiza kuwa viongozi wa mitaa wana wajibu wa kukutana na wazazi mara kwa mara kwa ajili ya kujadiliana namna ya kuwasaidia watoto kuishi salama na kujitambua wakiwa shuleni.

Sauti ya Sadi Kombo – 2 Mwenyekiti wa Mtaa wa Pachoto A

Kwa upande mwingine, Judith Chitanda kutoka shirika la Nerio Paralegal pamoja na Sajenti Esta kutoka dawati la jinsia, Jeshi la Polisi Mkoa wa Mtwara, wameitaka jamii kutoa ushirikiano kwa kutoa taarifa pale mtoto anapopata ujauzito ili hatua stahiki zichukuliwe dhidi ya wahusika na kusaidia kutokomeza mimba mashuleni.

Sauti ya Judith Chitanda na Sajent Esta – Dawati la Jinsia, Jeshi la Polisi

Share:

Read More

CUF yasisitiza umuhimu wa kupiga kura,Octoba 29,2025

 

Mgombea urais kupitia tiketi ya Chama cha Wananchi (CUF), Gombo Samandito Gombo akizungumza na waanishi wa habari mkoani Mtwara (Picha na Musa Mtepa)

Mgombea urais wa CUF, Gombo Samandito Gombo, amewataka Watanzania kujitokeza kwa wingi kupiga kura Oktoba 29, 2025, akiahidi huduma bora za jamii na maendeleo ya kweli endapo chama chake kitaunda serikali

Na Musa Mtepa

Mgombea urais kupitia tiketi ya Chama cha Wananchi (CUF), Gombo Samandito Gombo, amewataka wananchi kujitokeza kwa wingi kushiriki katika Uchaguzi Mkuu utakaofanyika Oktoba 29, 2025, kwa kuchagua viongozi wanaowataka ili kuleta maendeleo ya kweli kwa taifa.

Akizungumza na Waandishi wa habari Oktoba 8, 2025, mjini Mtwara, Gombo amesema kuwa fikra za baadhi ya wananchi kutoshiriki kupiga kura haziwezi kuwasaidia Watanzania kwa namna yoyote ile na kusisitiza kuwa ni muhimu kila mmoja kutumia haki na nguvu yake ya kikatiba kwa kumpigia kura mgombea wa CUF.

Sauti ya 1 Gombo Samandito Gombo Mgombea Urais CUF

Aidha, Gombo ameongeza kuwa chama hicho hakikatishwi tamaa na idadi ya watu wanaojitokeza kwenye mikutano ya kampeni, kwani CUF inaamini kuwa uungwaji mkono kutoka kwa wananchi ni mkubwa na unaendelea kuimarika kila siku.

Sauti ya 2 Gombo Samandito Gombo Mgombea Urais CUF

Akizungumzia sera za chama chake, Gombo amesema kuwa endapo CUF itashinda uchaguzi na kuunda serikali, itahakikisha wananchi wa Mtwara na Watanzania kwa ujumla wanapata huduma bora za kijamii, ikiwemo matibabu bure na miundombinu ya kisasa.

Sauti ya 3 Gombo Samandito Gombo Mgombea Urais CUF

Chama cha Wananchi (CUF) ni miongoni mwa vyama vinavyowania nafasi ya kuongoza nchi katika Uchaguzi Mkuu wa mwaka 2025, ambapo wagombea mbalimbali wameendelea na kampeni zao katika maeneo mbalimbali nchini.

Share:

Read More

Mkaa wenye moto waunguza nyumba Mangamba chini

 

Sehemu ya Nyumba ya Bw Roboti iliyoteketea kwa Moto Oktoba 8,2025 (Picha na Grace Khamisi)

Nyumba ya mkazi wa Mangamba Chini, Bw. Roboti, imeteketea kwa moto asubuhi ya Oktoba 8, 2025, kutokana na mkaa uliokuwa bado una moto. Jeshi la Zimamoto lilifika kwa haraka kuzima moto huo, huku viongozi na majirani wakitoa pole na elimu ya tahadhari dhidi ya moto majumbani

Na Grace Khamisi

Mkazi mmoja wa mtaa wa Mangamba Chini, katika Manispaa ya Mtwara Mikindani, anayefahamika kwa jina la Roboti, amejikuta katika wakati mgumu baada ya nyumba yake kuteketea kwa moto. Tukio hilo limetokea majira ya saa tatu asubuhi, Oktoba 8, 2025.

Wakizungumza na Jamii fm redio, majirani wa Bw. Roboti, Bi. Mariamu Yusufu na Mohamedi Moa ,wamesema kuwa wakati moto huo ulipoanza walikuwa nyumba ya jirani, karibu na nyumba ya Roboti, ndipo walipoona moshi na kuwajulisha majirani wengine ili kusaidia kuzima moto huo.

Sauti ya Mariamu Yusufu – Jirani wa Bw. Roboti

Kwa upande wake, Bw. Roboti ambaye ni muathirika wa tukio hilo, amesema kuwa alipata taarifa za kuungua kwa nyumba yake kupitia simu alipokuwa kazini, na alilazimika kukatisha kazi ili kufika nyumbani haraka kwa ajili ya kuokoa mali na kusaidia kuuzima moto huo.

Sauti ya Bw. Roboti – Muathirika wa Moto

Naye Mrakibu Msaidizi wa Jeshi la Zimamoto na Uokoaji Mkoa wa Mtwara, Ambros Ndunguru, amesema chanzo cha moto huo ni kiroba cha mkaa kilichowekwa na Bw. Roboti bila kuchunguza kama mkaa huo ulikuwa bado una moto.

Aidha, Mrakibu Ndunguru ametumia fursa hiyo kutoa elimu kwa wananchi juu ya matumizi sahihi ya majiko ya mkaa, huku akitoa onyo dhidi ya tabia ya kuzima mkaa wa moto kwa kutumia majivu, akisema ni hatari kwa usalama wa makazi.

Sauti ya Ambros Ndunguru – Mrakibu Msaidizi wa Jeshi la Zimamoto na Uokoaji

Mrakibu msaidizi wa Jeshi la zimamoto na uokoaji Ambrosi Ndunguru akizungumza na wakazi wa mtaa wa Mangamba chini jinsi ya matumizi sahihi ya majiko ya mkaa(Picha na Grace Khamisi)

Kwa upande wake, Mwenyekiti wa Mtaa wa Mangamba Chini, Bw. Abdala Abdala, amempa pole Bw. Roboti kwa tukio hilo, huku akilishukuru Jeshi la Zimamoto na Uokoaji kwa kufika kwa haraka na kuzuia madhara makubwa zaidi.

Sauti ya Abdala Abdala – Mwenyekiti wa Mtaa wa Mangamba Chini

Share:

Read More